ਮੁੰਬਈ ਪੁਲਿਸ ਨੇ ਮੁਹਰਮ ਦੇ ਜਲੂਸ ਦੌਰਾਨ ਕਰੀਬ 15,000 ਲੋਕਾਂ ਨੂੰ ਜ਼ਹਿਰ ਦੇਣ ਦੀ ਕਥਿਤ ਸਾਜ਼ਿਸ਼ ਰਚਣ ਦੇ ਮਾਮਲੇ ‘ਚ ਪੁਣੇ ਵਾਸੀ 39 ਸਾਲਾ ਫੈਯਾਜ਼ ਪ੍ਰੇਮਜੀ ਖ਼ਿਲਾਫ਼ ਮਜ਼ਗਾਂਵ ਅਦਾਲਤ ‘ਚ 700 ਪੰਨਿਆਂ ਦੀ ਚਾਰਜਸ਼ੀਟ ਦਾਖ਼ਲ ਕੀਤੀ ਹੈ। ਪੁਲਿਸ ਮੁਤਾਬਕ, ਮੁਲਜ਼ਮ ਆਪਣੇ ਹੀ ਭਾਈਚਾਰੇ ਦੇ ਕੁਝ ਲੋਕਾਂ ਤੋਂ ਨਾਰਾਜ਼ ਸੀ ਅਤੇ ਇਸ ਰੰਜਿਸ਼ ਕਾਰਨ ਉਸ ਨੇ ਇਸ ਖੌਫ਼ਨਾਕ ਘਟਨਾ ਨੂੰ ਅੰਜਾਮ ਦੇਣ ਦੀ ਯੋਜਨਾ ਬਣਾਈ ਸੀ। ਫਿਲਹਾਲ ਮੁਲਜ਼ਮ ਆਰਥਰ ਰੋਡ ਜੇਲ੍ਹ ‘ਚ ਬੰਦ ਹੈ ਅਤੇ ਪੁਲਿਸ ਵੱਲੋਂ ਦਾਖ਼ਲ ਕੀਤੇ ਗਏ ਦੋਸ਼ ਪੱਤਰ ‘ਚ 30 ਤੋਂ ਵੱਧ ਗਵਾਹਾਂ ਦੇ ਬਿਆਨ ਸ਼ਾਮਲ ਕੀਤੇ ਗਏ ਹਨ।
ਮੁੰਬਈ – ਮੁੰਬਈ ਪੁਲਿਸ ਨੇ ਮੁਹਰਮ ਦੇ ਜਲੂਸ ਦੌਰਾਨ ਕਰੀਬ 15,000 ਲੋਕਾਂ ਨੂੰ ਜ਼ਹਿਰ ਦੇਣ ਦੀ ਕਥਿਤ ਸਾਜ਼ਿਸ਼ ਰਚਣ ਦੇ ਮਾਮਲੇ ‘ਚ ਪੁਣੇ ਵਾਸੀ 39 ਸਾਲਾ ਫੈਯਾਜ਼ ਪ੍ਰੇਮਜੀ ਖ਼ਿਲਾਫ਼ ਮਜ਼ਗਾਂਵ ਅਦਾਲਤ ‘ਚ 700 ਪੰਨਿਆਂ ਦੀ ਚਾਰਜਸ਼ੀਟ ਦਾਖ਼ਲ ਕੀਤੀ ਹੈ। ਪੁਲਿਸ ਮੁਤਾਬਕ, ਮੁਲਜ਼ਮ ਆਪਣੇ ਹੀ ਭਾਈਚਾਰੇ ਦੇ ਕੁਝ ਲੋਕਾਂ ਤੋਂ ਨਾਰਾਜ਼ ਸੀ ਅਤੇ ਇਸ ਰੰਜਿਸ਼ ਕਾਰਨ ਉਸ ਨੇ ਇਸ ਖੌਫ਼ਨਾਕ ਘਟਨਾ ਨੂੰ ਅੰਜਾਮ ਦੇਣ ਦੀ ਯੋਜਨਾ ਬਣਾਈ ਸੀ। ਫਿਲਹਾਲ ਮੁਲਜ਼ਮ ਆਰਥਰ ਰੋਡ ਜੇਲ੍ਹ ‘ਚ ਬੰਦ ਹੈ ਅਤੇ ਪੁਲਿਸ ਵੱਲੋਂ ਦਾਖ਼ਲ ਕੀਤੇ ਗਏ ਦੋਸ਼ ਪੱਤਰ ‘ਚ 30 ਤੋਂ ਵੱਧ ਗਵਾਹਾਂ ਦੇ ਬਿਆਨ ਸ਼ਾਮਲ ਕੀਤੇ ਗਏ ਹਨ।
ਲੌਜ ‘ਚ ਤਿਆਰ ਕੀਤੇ 15,000 ਤੋਂ ਵੱਧ ਜ਼ਹਿਰੀਲੇ ਕੈਪਸੂਲ
ਜਾਂਚ ‘ਚ ਸਾਹਮਣੇ ਆਇਆ ਹੈ ਕਿ BBA ਡਿਗਰੀ ਧਾਰਕ ਅਤੇ ਪੁਣੇ ‘ਚ ਪੇਂਟ ਨਿਰਮਾਣ ਦਾ ਕਾਰੋਬਾਰ ਕਰਨ ਵਾਲੇ ਫੈਯਾਜ਼ ਪ੍ਰੇਮਜੀ ਨੇ 50 ਕਿਲੋਗ੍ਰਾਮ ਤੋਂ ਵੱਧ ਜ਼ਿੰਕ ਫਾਸਫਾਈਡ ਖਰੀਦਿਆ ਸੀ, ਜਿਸ ਦੀ ਵਰਤੋਂ ਆਮ ਤੌਰ ’ਤੇ ਚੂਹੇ ਮਾਰਨ ਵਾਲੇ ਜ਼ਹਿਰ ਵਜੋਂ ਕੀਤੀ ਜਾਂਦੀ ਹੈ। ਵਾਰਦਾਤ ਨੂੰ ਅੰਜਾਮ ਦੇਣ ਤੋਂ ਪਹਿਲਾਂ ਉਹ ਡੋਂਗਰੀ ਸਥਿਤ ਇੱਕ ਲੌਜ ‘ਚ ਕਰੀਬ ਦੋ ਹਫ਼ਤੇ ਰਿਹਾ। ਇਸੇ ਦੌਰਾਨ ਉਸ ਨੇ 30,000 ਖਾਲੀ ਕੈਪਸੂਲ ਮੰਗਵਾਏ ਅਤੇ ਆਪਣੇ ਕਮਰੇ ‘ਚ ਹੀ 15,000 ਤੋਂ ਵੱਧ ਜ਼ਹਿਰੀਲੇ ਕੈਪਸੂਲ ਤਿਆਰ ਕੀਤੇ। ਪੁਲਿਸ ਨੇ ਛਾਪੇਮਾਰੀ ਦੌਰਾਨ ਇਨ੍ਹਾਂ ‘ਚੋਂ 14,900 ਕੈਪਸੂਲ ਬਰਾਮਦ ਕੀਤੇ ਸਨ।
ਦਰਦ ਨਿਵਾਰਕ ਦੱਸ ਕੇ ਵੰਡੀਆਂ ਜਾ ਰਹੀਆਂ ਸਨ ਗੋਲੀਆਂ
ਮੁਲਜ਼ਮ ਨੇ 26 ਜੂਨ ਨੂੰ ਮੁਹਰਮ ਦੇ ਜਲੂਸ ‘ਚ ਸ਼ਾਮਲ ਲੋਕਾਂ ਨੂੰ ਇਹ ਜ਼ਹਿਰੀਲੇ ਕੈਪਸੂਲ ਪੇਨਕਿਲਰ ਅਤੇ ਇਮਿਊਨਿਟੀ ਬੂਸਟਰ ਦੱਸ ਕੇ ਵੰਡਣੇ ਸ਼ੁਰੂ ਕਰ ਦਿੱਤੇ। ਪੁੱਛਗਿੱਛ ਦੌਰਾਨ ਉਸ ਨੇ ਦਾਅਵਾ ਕੀਤਾ ਕਿ ਮੁਹਰਮ ਦੌਰਾਨ ਮਾਤਮ ਦੇ ਸਮੇਂ ਹੋਣ ਵਾਲੇ ਦਰਦ ਤੋਂ ਰਾਹਤ ਦੇਣ ਲਈ ਉਹ ਇਹ ਗੋਲੀਆਂ ਦੇ ਰਿਹਾ ਸੀ। ਜਲੂਸ ‘ਚ ਸ਼ਾਮਲ 26 ਸਾਲਾ ਸਲਮਾਨ ਸਈਦ ਨੇ ਇੱਕ ਕੈਪਸੂਲ ਖਾ ਲਿਆ। ਇਸ ਤੋਂ ਤੁਰੰਤ ਬਾਅਦ ਉਸ ਨੂੰ ਉਲਟੀਆਂ ਅਤੇ ਬੇਚੈਨੀ ਹੋਣ ਲੱਗੀ, ਜਿਸ ਤੋਂ ਬਾਅਦ ਉਸ ਨੂੰ ਤੁਰੰਤ ਹਸਪਤਾਲ ‘ਚ ਦਾਖ਼ਲ ਕਰਵਾਇਆ ਗਿਆ
ਪੁਲਿਸ ਦੀ ਚੌਕਸੀ ਨਾਲ ਟਲਿਆ ਵੱਡਾ ਹਾਦਸਾ
ਜਲੂਸ ਦੀ ਸੁਰੱਖਿਆ ਲਈ ਤਾਇਨਾਤ ਪੁਲਿਸ ਕਰਮਚਾਰੀਆਂ ਨੇ ਫੈਯਾਜ਼ ਨੂੰ ਸ਼ੱਕੀ ਢੰਗ ਨਾਲ ਕੈਪਸੂਲ ਵੰਡਦੇ ਦੇਖ ਲਿਆ ਅਤੇ ਉਸ ਵੱਲੋਂ ਹੋਰ ਕੈਪਸੂਲ ਵੰਡਣ ਤੋਂ ਪਹਿਲਾਂ ਹੀ ਉਸ ਨੂੰ ਮੌਕੇ ’ਤੇ ਹਿਰਾਸਤ ‘ਚ ਲੈ ਲਿਆ।
ਪੁਲਿਸ ਦਾ ਮੰਨਣਾ ਹੈ ਕਿ ਘੱਟੋ-ਘੱਟ 10 ਲੋਕਾਂ ਨੇ ਇਹ ਗੋਲੀਆਂ ਖਾਧੀਆਂ ਸਨ, ਪਰ ਜ਼ਹਿਰ ਦੇ ਲੱਛਣ ਦਿਖਾਈ ਦੇਣ ਤੋਂ ਬਾਅਦ ਸਿਰਫ਼ ਦੋ ਲੋਕ ਹੀ ਰਸਮੀ ਸ਼ਿਕਾਇਤ ਲੈ ਕੇ ਸਾਹਮਣੇ ਆਏ। ਖਦਸ਼ਾ ਹੈ ਕਿ ਹੋਰ ਲੋਕਾਂ ਨੇ ਵੀ ਇਹ ਗੋਲੀਆਂ ਖਾਧੀਆਂ ਹੋਣਗੀਆਂ ਅਤੇ ਸਮੇਂ ਸਿਰ ਨਿੱਜੀ ਪੱਧਰ ’ਤੇ ਇਲਾਜ ਕਰਵਾ ਲਿਆ ਹੋਵੇਗਾ।
ਨਿੱਜੀ ਰੰਜਿਸ਼ ਕਾਰਨ ਚੁੱਕਿਆ ਕਦਮ
ਬਰਾਮਦ ਕੀਤੇ ਗਏ ਕੈਪਸੂਲਾਂ ਨੂੰ ਰਸਾਇਣਕ ਜਾਂਚ ਲਈ ਫੋਰੈਂਸਿਕ ਸਾਇੰਸ ਲੈਬਾਰਟਰੀ ਭੇਜਿਆ ਗਿਆ ਹੈ। ਇਸ ਦੀ ਮੁੱਢਲੀ ਜਾਂਚ ‘ਚ ਜ਼ਿੰਕ ਫਾਸਫਾਈਡ ਦੀ ਪੁਸ਼ਟੀ ਹੋਈ ਹੈ। ਪੁਲਿਸ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਪੂਰੀ ਫੋਰੈਂਸਿਕ ਰਿਪੋਰਟ ਮਿਲਣ ਤੋਂ ਬਾਅਦ ਅਦਾਲਤ ‘ਚ ਇੱਕ ਸਪਲੀਮੈਂਟਰੀ ਚਾਰਜਸ਼ੀਟ ਦਾਖ਼ਲ ਕੀਤੀ ਜਾਵੇਗੀ।
ਜਾਂਚ ਅਧਿਕਾਰੀ ਮੁਤਾਬਕ, ਪੁੱਛਗਿੱਛ ਦੌਰਾਨ ਮੁਲਜ਼ਮ ਕਾਫ਼ੀ ਪਰੇਸ਼ਾਨ ਦਿਖਾਈ ਦਿੱਤਾ। ਉਸ ਨੇ ਦੋਸ਼ ਲਗਾਇਆ ਕਿ ਉਸ ਦੇ ਆਪਣੇ ਖੋਜਾ ਸ਼ੀਆ ਭਾਈਚਾਰੇ ਦੇ ਕੁਝ ਲੋਕਾਂ ਨੇ ਉਸ ਦੀ ਜ਼ਿੰਦਗੀ ਬਹੁਤ ਮੁਸ਼ਕਲ ਬਣਾ ਦਿੱਤੀ ਸੀ, ਜਿਸ ਕਾਰਨ ਉਸ ਨੇ ਗੁੱਸੇ ‘ਚ ਆ ਕੇ ਇਹ ਕਦਮ ਚੁੱਕਿਆ।
METRO TIME NEWS
Posted on 3rd October 2026