“ਮੈਂ ਗ੍ਰੀਨਵੇਅ ਦੀ ਨੁਮਾਇੰਦਗੀ ਹਾਸਲ ਕਰਨ ਅਤੇ ਸਾਡੇ ਭਾਈਚਾਰੇ ਦੇ ਸੋਹਣੇ ਭਵਿੱਖ ਲਈ ਕੰਮ ਕਰਨ ਦਾ ਇਹ ਮੌਕਾ ਦੇਣ ਲਈ ਲਿਬਰਲ ਪਾਰਟੀ ਦਾ ਦਿਲੋਂ ਧੰਨਵਾਦ ਕਰਦਾ ਹਾਂ” – Rattan Virk for Greenway

ਆਸਟ੍ਰੇਲੀਆ ਵਿੱਚ ਫੈਡਰਲ ਚੋਣਾਂ ਮਈ ਮਹੀਨੇ ਤੋਂ ਪਹਿਲਾਂ ਕਿਸੇ ਵੀ ਸਮੇਂ ਐਲਾਨੀਆਂ ਜਾ ਸਕਦੀਆਂ ਹਨ। ਇਸ ਤੋਂ ਪਹਿਲਾਂ ਸਾਰੀਆਂ ਸਿਆਸੀ ਪਾਰਟੀਆਂ ਵੱਲੋਂ ਆਪਣਾ ਉਮੀਦਵਾਰਾਂ ਦੇ ਨਾਮ ਘੋਸ਼ਿਤ ਕੀਤੇ ਜਾ ਰਹੇ ਹਨ। ਇਸ ਸੰਦਰਭ ਵਿੱਚ ਪ੍ਰਮੁੱਖ ਵਿਰੋਧੀ ਧਿਰ Liberal Party of Australia ਨੇ NSW ਸੂਬੇ ਤੋਂ ਡਾ. ਰਤਨਦੀਪ ਕੌਰ ਵਿਰਕ ਨੂੰ ਆਪਣਾ ਉਮੀਦਵਾਰ ਬਣਾਇਆ ਹੈ। ਪਿਛਲੇ ਦਿਨੀਂ, ਸਿਡਨੀ ਦੇ ਪੱਛਮੀ ਇਲਾਕੇ Stanhope ਵਿੱਚ, ਫੈਡਰਲ ਵਿਰੋਧੀ ਨੇਤਾ Peter Dutton ਨੇ ਉਨ੍ਹਾਂ ਦੇ

ਸੰਸਦੀ ਦਫਤਰ ਦਾ ਉਦਘਾਟਨ ਕੀਤਾ। ਡਾ. ਵਿਰਕ, ਜਿਨ੍ਹਾਂ ਦਾ ਪਿਛੋਕੜ ਪੰਜਾਬ ਦੇ ਬਠਿੰਡਾ ਜ਼ਿਲ੍ਹੇ ਨਾਲ ਹੈ, ਨੂੰ Greenway ਦੀ ਫੈਡਰਲ ਸੀਟ ਤੋਂ ਟਿਕਟ ਦਿੱਤੀ ਗਈ ਹੈ। ਡਾ. ਵਿਰਕ ਨੇ ਕਿਹਾ ਕਿ ਉਹ 18 ਸਾਲ ਪਹਿਲਾਂ ਆਸਟ੍ਰੇਲੀਆ ਆਏ ਸਨ। “ਆਸਟ੍ਰੇਲੀਆ ਨੇ ਮੈਨੂੰ ਤੇ ਮੇਰੇ ਪਰਿਵਾਰ ਨੂੰ ਬਹੁਤ ਕੁਝ ਦਿੱਤਾ ਹੈ। ਮੈਂ ਇਸ ਮੌਕੇ ਤਹਿਤ ਵਚਨਬੱਧ ਹਾਂ ਕਿ ਮੈਂ ਆਪਣੇ ਦੇਸ਼ ਅਤੇ ਆਪਣੇ ਹਲਕੇ ਦੇ ਲੋਕਾਂ ਦੀ ਸੇਵਾ ਵਿੱਚ ਹਾਜ਼ਿਰ ਹੋਵਾਂ ਅਤੇ ਉਨ੍ਹਾਂ ਲਈ ਕੁਝ ਚੰਗਾ ਕਰ ਸਕਾਂ,” ਉਨ੍ਹਾਂ ਨੇ ਕਿਹਾ। ਉਨ੍ਹਾਂ ਦੇ ਪਤੀ ਅਤੇ ਸਮਾਜਿਕ ਕਾਰਕੁੰਨ ਜਗਵਿੰਦਰ ਸਿੰਘ ਵਿਰਕ ਨੇ ਦੱਸਿਆ ਕਿ Greenway ਦੀ ਸੰਸਦੀ ਸੀਟ ਵਿੱਚ ਨਵੀਂ ਹਲਕਾਬੰਦੀ ਮੁਤਾਬਕ ਤਕਰੀਬਨ 27 ਫੀਸਦ ਭਾਰਤੀ ਮੂਲ ਦੇ ਵੋਟਰ ਵੱਸਦੇ ਹਨ, ਜਿਨ੍ਹਾਂ ਦੀ ਇਸ ਵਾਰ ਖਾਸ ਅਹਿਮੀਅਤ ਹੋਵੇਗੀ। ਇਸ ਸੀਟ ਤੋਂ ਮੌਜੂਦਾ ਫੈਡਰਲ ਕੈਬਿਨੇਟ ਮੰਤਰੀ, Labor Party ਵੱਲੋਂ Michelle Rowland ਜਿੱਤਦੇ ਆਏ ਹਨ। ਇਸ ਨਾਲ ਇਹ ਮਾਮਲਾ ਦਿਲਚਸਪ ਹੋਣ ਦੀ ਉਮੀਦ ਹੈ।